Հայաստանին 1,5 միլիոն եվրո կտրամադրվի միջուկային անվտանգության արդյունավետ մշակույթի հասնելու և միջուկային անվտանգության, ճառագայթային պաշտպանության ամենաբարձր չափանիշներն իրականացնելու համար: Այս օժանդակությունը կտրամադրվի Հայաստանի Հանրապետության և Եվրոպական հանձնաժողովի միջև «Միջուկային անվտանգության մշակույթի խթանում. Հայաստան (Բաղադրիչ Ա)» 2020/042-470 ֆինանսավորման համաձայնագրի շրջանակներում, որի ստորագրմանը գործադիրը համաձայնություն տվեց սույն թվականի հունիսի 17-ի նիստում:
«Ծրագրի իրականացումը հնարավորություն կտա Հայաստանի Հանրապետությանը ներդնել միջուկային անվտանգության արդյունավետ մշակույթ, ստեղծել միջուկային և ճառագայթային անվտանգության կարգավորման ենթակառուցվածք և իրավական դաշտ, որոնք համապատասխանում են ԵՄ դիրեկտիվներին, ինչպես նաև հնարավորինս բավարարում են Արևմտյան Եվրոպայի միջուկային անվտանգության կարգավորման մարմինների ասոցիացիայի անվտանգության չափանիշներին և կարտացոլեն եվրոպական լավագույն փորձը և միջազգային չափանիշները»,- մասնավորապես նշված է ՀՀ կառավարության որոշման հիմնավորման մեջ: Աղբյուրի համաձայն՝ ՀՀ միջուկային անվտանգության կարգավորման կոմիտեն պետք է մոտարկի միջուկային և ճառագայթային անվտանգության կարգավորման ենթակառուցվածքը ԵՄ դիրեկտիվներին՝ ԵՄ-Հայաստան Համապարփակ և ընդլայնված գործընկերության համաձայնագրին (CEPA) համապատասխան։ Այդ դիրեկտիվներն են.
- Խորհրդի 2006 թվականի նոյեմբերի 20-ի հրահանգը 2006/117/ԵՎՐԱՏՈՄ ռադիոակտիվ թափոնների և աշխատած վառելիքի փոխադրման վերահսկման և հսկման մասին
- Խորհրդի 2014 թվականի հուլիսի 8-ի հրահանգը 2014/71/ ԵՎՐԱՏՈՄ ԱԷԿ-ների միջուկային անվտանգության ենթակառուցվածք ստեղծելու մասին
- Խորհրդի 2011/70 / ԵՎՐԱՏՈՄ 2011 թվականի հուլիսի 19-ի հրահանգը աշխատած վառելիքի և ռադիոակտիվ թափոնների պատասխանատու և անվտանգ կառավարման ենթակառուցվածք ստեղծելու մասին
- Խորհրդի 2013 թվականի հոկտեմբերի 22-ի 2013/51/ԵՎՐԱՏՈՄ-ի հրահանգը, որով սահմանվում են բնակչության առողջության պաշտպանության պահանջները՝ կապված մարդկանց սպառման համար նախատեսված ջրում ռադիոակտիվ նյութերի հետ
- Խորհրդի 2013 թվականի դեկտեմբերի 5-ի 2013/59/ԵՎՐԱՏՈՄ-ի հրահանգը իոնացնող ճառագայթման ազդեցության արդյունքում առաջացող վտանգներից պաշտպանվելու համար անվտանգության հիմնական չափորոշիչների վերաբերյալ:
ՀՀ միջուկային անվտանգության կարգավորման կոմիտեն արդեն նախաձեռնել է նոր ատոմային օրենքի նախագծի մշակումը՝ հաշվի առնելով ԵՄ համապատասխան դիրեկտիվները, Արևմտյան Եվրոպայի միջուկային անվտանգության կարգավորման մարմինների ասոցիացիայի անվտանգության չափանիշները և Ատոմային էներգիայի միջազգային գործակալության անվտանգության պահանջները։
Հունիս 24, 2021 at 11:52