Մարտերը շփման գծի երկայնքով տարբեր ինտենսիվությամբ շարունակվում են․ ՊԲ

Ադրբեջանի Զինված ուժերի ստորաբաժանումները, տարբեր զինատեսակներից կրակի ուղեկցմամբ, շարունակում են դիրքային առաջխաղացման գործողությունները՝ թիրախավորելով նաև քաղաքացիական ենթակառուցվածքներ: Այս մասին հաղորդում է Արցախի Հանրապետության Պաշտպանության նախարարության մամուլի ծառայությունը։
«Պաշտպանության բանակի ստորաբաժանումները պաշտպանողական բնույթի գործողություններով համառ դիմադրություն են ցույց տալիս Ադրբեջանի ԶՈՒ ստորաբաժանումներին` պատճառելով կորուստներ»,- նշված է հաղորդագրության մեջ:

Արցախի Հանրապետության Մարդու իրավունքների պաշտպան Գեղամ Ստեփանյանն իր ֆեյսբուքյան էջում հայտնել է, որ ժամը 03:00-ի դրությամբ, Մարդու իրավունքների պաշտպանի գրասենյակ ստացած տեղեկատվության համաձայն՝ խաղաղ բնակչության շրջանում կա 35 վիրավոր՝ 13 երեխա, 15 կին և 7 տղամարդ։ «Քաղաքացիական անձանց շրջանում զոհեր և վիրավորներ արձանագրվել են Արցախի բոլոր շրջաններում։ Խաղաղ բնակչության շրջանում զոհերի թիվը հասել է 7-ի՝ 3 կին, 2 երեխա և 2 տղամարդ»,- նշված է գրառման մեջ։

Մեկ այլ գրառմամբ՝ Արցախի Հանրապետության օմբուդսմենը հայտնել է, որ Արցախի Ասկերանի, Մարտակերտի, Մարտունիի և Շուշիի շրջանների 16 քաղաքացիական բնակավայրերից տարհանվել է ավելի քան 7000 մարդ:

Հիշեցնենք, որ ադրբեջանական զինուժը սեպտեմբերի 19-ին` ժամը 13։00-ի սահմաններում, Լեռնային Ղարաբաղի հետ շփման գծի ողջ երկայնքով խախտել է հրադադարը` հասցնելով հրթիռահրետանային հարվածներ։

Լուսանկարը՝ CivilNet-ի

Սեպտեմբեր 20, 2023 at 11:11