ԲՆԱՊԱՀՊԱՆՈՒԹՅՈՒՆ 2010. ԹՈՒՆԱՎՈՐ ԹԱՓՈՆՆԵՐ, ՋՐԻՆ ԱՌՆՉՎՈՂ ԹԵՄԱՆԵՐ ԵՎ ՔՆՆԱՐԿՈՒՄՆԵՐ ԴԵԼՖԻՆՆԵՐԻ ՇՈՒՐՋ

ԲՆԱՊԱՀՊԱՆՈՒԹՅՈՒՆ 2010. ԹՈՒՆԱՎՈՐ ԹԱՓՈՆՆԵՐ, ՋՐԻՆ ԱՌՆՉՎՈՂ ԹԵՄԱՆԵՐ ԵՎ ՔՆՆԱՐԿՈՒՄՆԵՐ ԴԵԼՖԻՆՆԵՐԻ ՇՈՒՐՋ

Կարինե Իոնեսյան, «ԱրմենիաՆաու»

Հայաստանի հարավային շրջանի բնակչությունն ամբողջ տարին պայքարում էր ուրանի հանքավայրի շահագործման դեմ: Չնայած նոյեմբերին Կապանում անցկացված լուրջ հանրահավաքների ու բողոքի տարբեր ակցիաների` ՀՀ կառավարությունը և ուրանի ծրագիրն իրականացնող «Հայ-ռուսական լեռնահանքային կազմակերպությունը» հետ չկանգնեցին ծրագրից:

Այս տարի կառավարությունը 500 տոննա թունաքիմիկատ պարունակող խորհրդային ժամանակներում կառուցված թունաքիմիկատների գերեզմանոցում վերանորոգման աշխատանքներ իրականացրեց: Տարեսկզբին անհայտ անձինք ներխուժել էին թունաքիմիկատների գերեզմանոց և ինժեներական ծանր տեխնիկայով անցել գերեզմանոցի վրայով` բաց երկնքի տակ թողնելով պարկերով ու շշերով վտանգավոր թունաքիմիկատները:

ՀՀ վարչապետ Տիգրան Սարգսյանը տարեվերջին զայրացրեց բնապահպաններին քաղցրահամ ջրի արտահանման իր առաջարկով: Բնապահպանները չեն հասկանում, թե Հայաստանն ինչպես է խմելու ջուր արտահանելու, եթե  երկրում գյուղերը կանգնած են ջրի բացակայության խնդրի առջև:

Ճահճացման և տարբեր գործարանների շահագործման հետևանքով Սևանա լճում պահպանված ձկնատեսակները տարբեր հիվանդություններով վարակվելու վտանգի տակ են, քանի որ Սևանի մակարդակը շարունակում է բարձրանալ:

Լոռու մարզի բնապահպաններն անհանգստացած են, որ Ալավերդի (Երևանից 162 կմ հյուսիս) քաղաքի մոտ գտնվող մկնդեղի գերեզմանոցն ուժեղ երկրաշարժի դեպքում կարող է հիմնովին քանդվել և երկրում բնապահպանական աղետի պատճառ դառնալ:

Լոռու մարզի գտնվող պոչամբարի մետաղական թափոնները բնապահպանական վտանգ են ներկայացնում Ճոճկան և Այրում գյուղերի շրջակայքում, և մտավախություն կա, որ հորդառատ տեղումների կամ երկրաշարժի ժամանակ կարող են անձրևաջրերի հետ խառնվելով լցվել Դեբեդը:

Գեղարքունիքի մարզի մոտ 500 բնակիչներ, փակելով Երևան-Սևան մայրուղին, բարձրաձայնեցին Արգիճի գետի Գայլաձոր վտակի վրա հէկի կառուցման խնդիրը:

Արարատի մարզի Զանգակատուն և Ուրցալանջ գյուղերի բնակիչները լրջորեն անհանգստացած էին գյուղերի հարակից տարածքներում ռադիոակտիվ վտանգավոր քիմիական նյութերի գերեզմանոց կառուցելու պատճառով: Ապրիլին Զանգակատան բնակիչները գյուղից պարզապես վռնդեցին մի խումբ երկրաբանների, որոնք գյուղ էին եկել վտանգավոր ռադիոակտիվ նյութերի և թափոնների թաղման նպատակով ընդերքի տեղամասերի տեղագրական քարտեզ կազմելու:

Մայիսին «Մենք ենք այս քաղաքի տերը» քաղաքացիական նախաձեռնության ակտիվիստները STOP գրությամբ կանաչ զգեստով մոտ 40 րոպե ձեռք ձեռքի տված կանգնել էին Աբովյան փողոցի կողմում գտնվող շինհրապարակի հարևանությամբ: Նրանք փորձում էին բարձրաձայնել Երևանի Ուսանողական այգում երկու սրճարանների կառուցման նպատակով քաղաքի կենտրոնում ծառահատումների խնդիրը:

Քննարկումների տեղիք տված դելֆինարիայի շինարարությունը Երևանում շարունակվեց` չնայած Հայաստանի բնապահպանների և կենդանիների իրավունքների պաշտպանների բողոքների, որոնք պնդում են, թե Հայաստանը նման զվարճալիքի համար հարմար չէ:

Հունվար 11, 2011


Առնչվող նյութեր


Կատեգորիա

ավելին
պակաս

Մարզեր