ԷկոԼուր
Վարչապետ Նիկոլ Փաշինյանն այսօր քննարկում անցկացրեց Ամուլսարի հանքի շահագործման հարցի վերաբերյալ։ Քննարկմանը մասնակցեցին ՀՀ կառավարության անդամներ, շահագրգիռ գերատեսչությունների ղեկավարներ, Ջերմուկ համայնքի ավագանու անդամներ, Գորայք, Զառիթափ, Ջերմուկ համայնքների բնակիչներ, կրթական և առողջարանային հաստատությունների ներկայացուցիչներ, բնապահպաններ:
Այս կապակցությամբ ՀՀ վարչապետի պաշտոնական կայքը հաղորդում է. «Կառավարության ղեկավարը ներկայացրել է Ամուլսարի հանքի ծրագրի առնչությամբ հարուցված քրեական գործի շրջանակում իրականացված աշխատանքները, անդրադարձել միջազգային փորձաքննության եզրակացությանը և դրա վերլուծությանը: Վարչապետը նշել է, որ այսօր առավոտյան խորհրդակցություն է անցկացրել պետական պատկան մարմինների ներկայացուցիչների մասնակցությամբ, որի ընթացքում քննարկվել են Ամուլսարի հանքի ծրագրին առնչվող մի շարք մանրամասներ, և խորհրդակցության սղագրությունը կհրապարակվի օրվա ընթացքում:
Հաջորդիվ վարչապետ Նիկոլ Փաշինյանը պատասխանել է քննարկման մասնակիցների մի շարք հարցերին: Քննարկման տեսանյութը կհրապարակվի քիչ անց»:
Քննարկմանը մասնակցած իրավաբան-էկոլոգ, «Հայաստանի անտառներ» ՀԿ-ի Նազելի Վարդանյանը, ԷկոԼուրին մասնավորապես, ասաց, որ հանդիպման ժամանակ վարչապետը հայտարարել է, որ իրենք ոչ մի իրավական հիմք չունեն թույլ չտալու, որ Ամուլսարի հանքավայրն աշխատի: Ըստ Նազելի Վարդանյանի՝ Նիկոլ Փաշինյանն ասել է, որ նոր փորձաքննություն կլինի: «Նոր փորձաքննության հնարավորություն կա մեր օրենսդրությամբ: Սակայն դա ո՛չ կառավարության, ո՛չ մեր որոշելիք հարց չէ: Ընկերության իրավունքն է դիմել կամ չդիմել նոր փորձաքննության համար», - ասաց Նազելի Վարդանյանը:
Օգոստոս 19, 2019 at 17:25