«Հայաստանի կենդանի լանդշաֆտները շուկայի զարգացման համար» (LILA) ծրագրի շրջանակում ստեղծված շահառու բիզնեսները կներկայացվեն արաբական զբոսաշրջային շուկային:
«Ռազմավարական զարգացման գործակալություն» (ՌԶԳ) ՀԿ-ն և «Հայաստանի կենդանի լանդշաֆտները շուկայի զարգացման համար» ծրագրի գործընկեր «Ռուբեն տուրս» ընկերությունը սեպտեմբերի 25-29-ը ճանաչողական այց էին կազմակերպել Արաբական միացյալ էմիրությունների (ԱՄԷ) ճամփորդական ազդեցիկ բլոգերների ու մեդիաինֆլուենսերների համար: Շրջայցը հնարավոր էր դարձել այս տարի մայիսին Դուբայում անցկացված «ATM Dubai 2024» միջազգային զբոսաշրջային ցուցահանդեսին հայկական զբոսաշրջային ընկերությունների մասնակցության և դրա ընթացքում ձեռքբերված պայմանավորվածության շնորհիվ:
«Դուբայ այցի շրջանակներում գործընկերային կապեր էինք հաստատել էմիրությունների մի քանի զբոսաշրջային բլոգերների ու մեդիաինֆլուենսերների հետ: Նրանք այցելել են ծրագրի թիրախ համայնքներ ու շահառու բիզնեսներ: Ներկայացրել ենք այն բոլոր զբոսաշրջային պրոդուկտները, որոնք ստեղծել ենք LILA ծրագրի շրջանակներում: Պայմանավորվածություն է ձեռք բերվել, որպեսզի բլոգերներն ու մեդիաինֆլուենսերները խթանեն այս պրոդուկտները արաբական շուկայում և առաջիկա ամիսներին ու տարիներին ունենանք զբոսաշրջային հոսքեր «Ռուբեն տուրսի» հետ»,- նշեց LILA ծրագրի ՌԶԳ-ի կողմից իրականացվող բաղադրիչի համակարգող Ալլա Ղազարյանը:
Շրջագայության ընթացքում հյուրերը ծանոթացել են հայկական մշակույթին, բացահայտել Հայաստանի բացառիկ բնությունն ու հյուրընկալությունը: Ճամփորդական ազդեցիկ բլոգերներն ու մեդիաինֆլուենսերները սոցիալական մեդիայի իրենց էջերում շարունակում են լուսաբանել Հայաստան այցը՝ այն համեմելով գրավիչ լուսանկարներով, տեսանյութերով ու պատմություններով։
«Հայաստանի կենդանի լանդշաֆտները շուկայի զարգացման համար» (ԼԻԼԱ ) ծրագիրը ֆինանսավորվում է Շվեյցարիայի կառավարության կողմից՝ Շվեյցարիայի զարգացման և համագործակցության գործակալության (SDC) միջոցով և իրականացվում է Բնության համաշխարհային հիմնադրամի (WWF) կովկասյան և հայաստանյան գրասենյակների կողմից՝ «Ռազմավարական զարգացման գործակալություն» (ՌԶԳ) ՀԿ-ի հետ համատեղ:
Հոկտեմբեր 30, 2024 at 11:14