Ստեղծվել է Հայաստանի կայուն և թափանցիկ էներգետիկ զարգացմանն ուղղված քաղաքացիական հասարակության կազմակերպությունների կոալիցիա

ԷկոԼուր

Կայուն և թափանցիկ էներգետիկայի զարգացման նպատակով Հայաստանում ստեղծվել է քաղաքացիական հասարակության կազմակերպությունների կոալիցիա:

Ներկայում այն բաղկացած է 22 անդամ կազմակերպություններից, որից 4-ը հիմնադիր անդամներն են: Նոյեմբերի 8-ին տեղի ունեցած նիստի ժամանակ կոալիցիայի հիմադիր անդամ կազմակերպության` «էներգախնայողության աջակցման հիմնադրամ» ՀԿ-ի գործադիր տնօրեն Աստղինե Պասոյանը ներկայացրեց ոլորտի խնդիրներն ու կոալիցիայի նպատակները:

Խնդիրներից են էներգիայի անարդյունավետ օգտագործման բացասական հետևանքները, վերականգնվող էներգետիկայի ոլորտում ներդրումների խոչընդոտները, կլիմայական մարտահրավերները և այլն:

Կոալիցիայի նպատակներն են՝

- նախաձեռնել համայնքներում կայուն էներգետիկայի ներդրումների խթանման համար կարգավորող-օրենսդրական դաշտի բարեփոխումներ,

- նախաձեռնել և աջակցել համայնքային գնումների գործընթացում էներգարդյունավետություն և վերականգնվող էներգետիկայի զարգացումն ապահովող կանոնակարգերի և կարգավորիչ միջոցների լավագույն փորձի հիման վրա հանրային քաղաքականությունների մշակման կամ բարելավման ու առաջխաղացման գործընթացներին,

- նպաստել Քաղաքապետների դաշնագրի անդամ քաղաքներում էներգաարդյունավետության, վերականգնվող էներգետիկայի և կլիմայի փոփոխության հարմարվողականության բարձրացման ուղղությամբ ծրագրերի, միջոցառումների և բյուջեների մոնիթորինգի արդյունավետ իրագործմանը,

- նպաստել ՏԻՄ-երի էներգարդյունավետության նախաձեռնությունների մշտադիտարկման և բարելավման մեխանիզմների և կարողությունների զարգացմանը՝ կարևորելով կին մասնագետների ներգրավումը գործընթացում,

- բարձրացնել ՔՀԿ-ների մասնակցությունը հանրային քաղաքականությունների մշակման, բարելավման, ջատագովության և մոնիթորինգի իրականացման գործում՝ համագործակցելով ոլորտային նախարարությունների և համապատասխան պետական մարմինների, միջազգային կառույցների, ինչպես նաև այլ շահառուների հետ,

- բարձրացնել կանանց մասնակցությունը էներգաարդյունավետության, կայուն էներգետիկ և կլիմատիկ զարգացման ոլորտում, այդ թվում նաև համայնքային գործունեության վերահսկողության և մշտադիտարկման գործում,

- ամրապնդել մոնիթորինգի, հանրային վերահսկողություն իրականացնելու և թափանցիկ և կայուն էներգետիկ զարգացմանն ուղղված գործունեության իրականացման հետ կապված ՔՀԿ-ների կարողությունները:

Նշենք, որ Կոալիցիայի հռչակագիրը բաց է քաղաքացիական հասարակության կազմակերպությունների համար: «ԷկոԼուր» տեղեկատվական ՀԿ-ն ևս միացել է հռչակագրին:

Կոալիցիան ստեղծվել է «ՔՀԿ-ները հանուն կայուն և թափանցիկ էներգետիկ զարգացման (EU4STED)» ծրագրի շրջանակներում, որն իրականացվում է ԵՄ աջակցությամբ:

Նոյեմբեր 09, 2018 at 17:50