ԷկոԼուր
ՀՀ Սյունիքի մարզում գտնվող Շաքի գյուղը հնուց ի վեր հայտնի է իր քաղցրահամ ջրերով։ Գյուղից սկիզբ է առնում Շաքի գետը, որի վրա գտնվում է Շաքիի ջրվեժը, իսկ ջրվեժի վրա կառուցված է փոքր ՀԷԿ:
Շաքիի ջրվեժը եղել է Շաքի գյուղի հպարտությունը և այստեղ է բերել բազմաթիվ զբոսաշրջիկների, սակայն այժմ գյուղացիները ամաչում են հյուրերին ցույց տալ իրենց ջրվեժը: «Մեր գեղեցիկ Շաքի ջրվեժը, որը մեծ համբավ է ունեցել սովետական ժամանակաշրջանում, այսօր չկա, ցամաքել է ՀԷԿ-ի շահագործման նպատակով», - ԷկոԼուրի հետ զրույցում ասաց Շաքիի գյուղապետարանի աշխատակիցը՝ նշելով, որ փոքր ՀԷԿ-ը գյուղի սոցիալական վիճակի և ոռոգման վրա չի ազդում, սակայն ազդեցություն է ունենում տուրիզմի վրա:
«Հյուրեր էինք ունենում, գալիս էին, ջրվեժով հիանում, հիմա գալիս են, նայում են՝ ամաչում ես...չորացածա: Իրանք (փոքր ՀԷԿ-ը) 30 տոկոս ջուրը անպայման պետք է բաց թողնեն, որպեսզի էս բնությունը չվերանա, բայց չորացնում են...էլ ձուկ էլ չմնաց, վերացավ, չկա», - բողոքեց գյուղի բնակիչը և կատակով ասաց. «Խաչբառի մեջ որ կա՝ չորացած ջրվեժ Սյունիքի մարզում, լրացնում ենք Շաքի»:
Հարցին՝ լինում է արդյոք, երբ բնակիչները տեսնում են ջրվեժը ջրով լի, գյուղացիներից մեկը պատասխանեց. «Եթե բարձրաստիճան հյուրեր ենք ունենում, տեսնում ենք ջրվեժը, թե չէ ընենց՝ չէ»:
Հետաքրքրվեցինք՝ ներկայացրե՞լ են արդյոք բնակիչները պահանջ-բողոք ՓՀԷԿ-ի ղեկավարությանը խնդրի վերաբերյալ: Ի պատասխան գյուղապետարանի աշխատակիցը ասաց. «Բազմիցս, թե ղեկավարության, թե ժողովրդի, թե առհասարակ գյուղ մտնող մարդկանց, հյուրերի կողմից: Ոչ մի փոփոխություն, հիդրոէլեկտրակայանն աշխատում է, գումար է բերում ամեն վայրկյան»:
Նյութը պատրաստվել է «Աջակցություն փոքր ՀԷԿ-երին վերաբերող բարեփոխումներին` գետային էկոհամակարգերի կայուն օգտագործման նպատակով հանրության և ՀՀ բնապահպանության նախարարության երկխոսության միջոցով» ծրագրի շրջանակներում:
 |
 |
 |
 |
Սեպտեմբեր 07, 2015 at 14:24