Համաշխարհային բանկի խմբի Միջազգային ֆինանսական կորպորացիան (IFC) հրաժարվեց «Lydian Internartional» ընկերության Ամուլսարի ծրագրի ֆինանսավորումից

Համաշխարհային բանկի խմբի Միջազգային ֆինանսական կորպորացիան (IFC) հրաժարվեց  «Lydian Internartional» ընկերության Ամուլսարի ծրագրի ֆինանսավորումից

ԷկոԼուր

Համաշխարհային բանկի խմբի Միջազգային ֆինանսական կորպորացիան (IFC) հրաժարվեց «Lydian Internartional» ընկերության Ամուլսարի ծրագրի ֆինանսավորումից, ինչի մասին IFC-ն նամակով հայտնեց IFC-ի պահանջների պահպանման գծով օմբուդսմեն Օսվալդու Գրատակոսուն: IFC-ի նամակը Ամուլասարի հանքավայրից ոսկու բաց եղանակով արդյունահանման և համաձուլվածքի ստացման ծրագրի ազդակիր համայնքների բնակիչների, հասարակական կազմակերպությունների բողոքի վերաբերյալ IFC-ի օմբուդսմենի հաշվետվության արձագանքն է:

Բողոքողները IFC-ից պահանջում էին հրաժարվել ծրագրից, քանի որ այն չի համապատասխանում IFC-ի ստանդարտներին և պահանջներին:

Բողոքի դիտարկման ընթացքում IFC-ի Օմբուդսմենի գրասենյակի (CAO) փորձագետները մի քանի անգամ եղան Հայաստանում, հանդիպեցին հասարակական կազմակերպությունների, Ջերմուկում ու Գնդեվազում տեղի բնակիչների հետ, ովքեր ստորագրել են բողոքի տակ, ինչպես նաև «Lydian Internartional» ընկերության ներկայացուցիչների հետ: Փորձագետներին ներկայացվեցին Ամուլսարի ծրագրի ռիսկերը ` կապված Ջերմուկ առողջարանի կորստի հետ, քանի որ առողջարանի անմիջական հարևանությամբ է գտնվելու հանքարդյունաբերական թափոնների համար նախատեսվող տեղադրավայրը և ոսկու հանքավայրից բաց արդյունահանման արդյունքում ծանր մետաղներով հարուստ փոշին: Ներկայացվել են Արփա և Որոտան գետավազանի աղտոտման, իսկ նրանց միջոցով 37 միլիոն խմ ծավալով խոշոր ջրային, պոտենցյալ խմելու ջրի պաշարի` Սևանա լճի աղտոտման վտանգները: Ներկայացվել են Գնդեվազ համայնքի բնակելի տների հարևանությամբ ցիանային արտադրության ռիսկերը, արոտավայրերի, մարգագետինների, օդի, առողջության համար ռիսկերը: Ներկայացվել են Ամուլսարի ծրագրի տարածքներում կենսաբազմազանության կորստի ռիսկերը:
Բողոքի դիտարկման մոտ 3 տարվա ընթացքում Ամուլսարի ծրագիրը փոխվեց, ավելացան ազդակիր համայնքները, հայտնվեցին Ամուլսարի ծրագրի սոցիալ-էկոլոգիական ազդեցության նոր անկախ փորձագիտական գնահատականներ:

Սակայն ընկերության կողմից ներկայացված Սոցիալ-էկոլոգիական գնահատականը չարտացոլեց այդ ռիսկերը` պնդելով, որ ռիսկերը կառավարելի են և հետևանքները կվերացվեն: CAO-ից 2017թ-ին ստանալով հաշվետվություն`բողոքողները չհամաձայնեցին հաշվետվության ձևակերպումների հետ, ինչի կապակցությամբ նամակ ուղարկեցին CAO/IFC (http://ecolur.org/en/news/amulsar/civil-society-doesnt-agree-with-ifc-ombudsmans-office-conclusions-on-complaint-of-incompliance-of-amulsar-project-with-ifc-standards/9341/):

Իր հերթին IFC-ն նույնպես հաշվետվությանն արձագանքեց նամակով, որում թեպետ ասված է, որ Ամուլսարի ծրագիրը առաջատար է, և որ նախագիծը կնպաստի Հայաստանում տնտեսական իրավիճակի լավացմանը, բայց դրա հետ մեկտեղ նշված է. «IFC-ն մի շարք ներդրումներ է կատարել «Lydian»-ում 2007թ-ից 2015թ-ը: Ներդրումներն ուղղված են երկրաբանահետախուզական աշխատանքների իրականացմանը, իսկ 2010թ-ից ` «Ամուլսար» առաջատար ծրագրի ուսումնասիրությունների և տեխնիկատնտեսական հիմնավորման համար` ի աջակցություն սոցիալ-էկոլոգիական ոլորտի կառավարման մեթոդների բարելավման: Հաշվի առնելով, որ «Lydian»-ին հաջովել է ներգրավել ֆինանսական միջոցներ մասնավոր հատվածից, IFC-ն հետ է կանչել իր ներդրումները «Lydian»-ից, քանի որ մենք ձգտում ենք ներդրումներ անել այնտեղ, որտեղ անհրաժեշտ է դա` կայուն տնտեսական զարգացմանը նպաստելու համար»,-նշված է IFC-ի նամակում:

16:57 Սեպտեմբեր 14, 2017


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news