ԳԱՂՏՆԻ ՆԱԽԱԳԻԾ ՍԵՎԱՆՈՒՄ

ԳԱՂՏՆԻ ՆԱԽԱԳԻԾ ՍԵՎԱՆՈՒՄ

«ԷկոԼուր»

Մինչ բնապահպանական հասարակական կազմակերպություններն անցկացնում են «S.O.S. Սեւան» կամպանիան, ուղղված Սեւանի ավազանում ոսկու կորզման ֆաբրիկայի կառուցման դեմ, եվ իշխանություններից պահանջում են պահպանել «Սեւանի մասին» ՀՀ օրենքը, որի 10-րդ հոդվածով ուղղակիորեն արգելվում է Սեւանի ավազանում լեռնահանքային գործունեությունը, հայտնվեց Շորժայի եվ Ջիլի հանքավայրերի շահագործման եվ Սեւանում լեռնահարստացուցիչ կոմբինատի կառուցման նոր նախագիծ:

Նոյեմբերի 12-ին՝ նախագծի շնորհանդեսի ժամանակ, պարզ դարձավ, որ այն արդեն իսկ ՀՀ բնապահպանության նախարարության Պետական էկոլոգիական փորձագիտության կողմից դրական եզրակացություն է ստացել, այն էլ գործնականորեն առանց հասարակական քննարկման: Ավելի քան 100 բնապահպանական հասարակական կազմակերպությունների առկայության պարագայում, որոնց մեկ երրորդը միավորված է Դաշինքում, ոչ ոք չգիտի նախագծի իրականացման մասին:

Այն հարցին, թե ինչու է խախտվել օրենքը, ՀՀ վարչապետ Տիգրան Սարգսյանը խոստացավ, որ հասարակական կազմակերպությունների համար քննարկումը կանցկացվի բնապահպանության նախարարության ներկայացուցիչների մասնակցությամբ, որտեղ հասարակայնությունն անհրաժեշտ բացատրությունները կստանա:

ՕՐԵՆՔԻՆ ԱՆՏԵՂՅԱԿ ՕՐԵՆՍԴԻՐԸ, ԿԱՄ՝ ՍԵՎԱՆԸ ԱԳԱՀՈՒԹՅԱՆ ԳԵՐԻ
Նելլի Դանիելյան, «Երկիր Մեդիա» հեռուստաընկերություն

Սեւանի ավազանում կառուցվող նոր հարստացուցիչ գործարանի մասին վերջին շրջանում տարածված լուրերն այսօր առարկայացան: Նորաստեղծ «Գեգամետ» ընկերությունը 25 մլն դոլարի ներդրում է նախատեսել Շորժայի եւ Ջիլի դունիտ-պերիդոտիտների եւ քրոմաքարի հանքավայրերի շահագործման եւ դրանց վերամշակման համար: Ընդ որում, վերամշակումը կատարվելու է Սեւանի ավազանում, կառուցվելու է ոչ թե մեկ լեռնահարստացուցիչ կոմբինատ, այլ մի քանի արտադրատեսակների մշակման գործարաններ:

«Մեր տեխնոլոգիաները անմնացորդ են: Վտանգավոր թափոններ չեն մնում: Բոլոր բաղադրիչները վերամշակվելու են: Քրոմի արտադրական մնացորդներից ստացվում է հրակայուն, բարձր որակի հումք, որը կարելի է վաճառել ձուլարաններին: Վերամշակումը կատարվում է առանց քիմիական նյութերի, միայն մաքուր ջրով»,-նշում է ՌԴ գունավոր մետաղների ինստիտուտի լաբորատորիայի վարիչ Պավել Կովգանը:

Ի դեպ, անկախ տեխնոլոգիաների գերարդիական լինելուց, «Սեւանի մասին» օրենքն արգելում է «անմիջական ազդեցության գոտում» ցանկացած արտադրության, հատկապես` «հանքանյութեր վերամշակող օբյեկտների տեղաբաշխումը»: Այդուհանդերձ, ոչ միայն սեփականատերերը, այլեւ ծրագրի ներկայացմանը ներկա ՀՀ վարչապետ Տիգրան Սարգսյանը օրենքի խախտում չեն տեսնում:

Տիգրան Սարգսյան. «Եթե հակասեր «Սեւանի մասին» օրենքին, ապա ես այստեղ չէի լինի: Խստագույնս ձեզ հետ միասին հետեւելու եմ, որ էկոլոգիական բոլոր նորմերը պահպանվեն»:

Ծրագրի հեղինակները նաեւ վստահեցնում են, որ այն ստացել է բնապահպանական փորձաքննության դրական եզրակացությունը, հասարակական լսումներ անցել:
Խաչիկ Մանուկյան, ԱԺ պատգամավոր. «Հասարակական լսումները տեղում ենք արել՝ Շորժայում»:

Բնապահպանական փորձաքննության կամ հանքավայրի շահագործման արտոնագրի մասին որեւէ տեղեկատվություն բնապահպանության նախարարության պաշտոնական կայքէջում գտնել չհաջողվեց, իսկ հասարակական կազմակերպություններն այս ծրագրի գոյության մասին չէին էլ լսել:

Այդուհանդերձ, ովքե՞ր են կանգնած բնության հաշվին իրականացող հերթական բիզնես ծրագրի հետեւում՝ համաձայն տարածված պաշտոնական հաղորդագրության, «Յունիբանկ»-ի եւ «Յունիստրիմ» բանկի սեփականատեր, ռուսաստանցի Գագիկ Զաքարյանը, հայաստանյան «Մետտա գրուպ» ընկերության հիմնադիր Վլադիմիր Գասպարյանը եւ Բրիտանական Վիրջինյան կղզիներում գրանցված «Տորենտ Հոլդինգ Լիմետեդ»-ի հիմնադիր Մհեր Բագրատյանը: Վերջին երկուսը, սակայն, շնորհանդեսին ներկա չէին, փոխարենը նախագիծն ակտիվորեն ներկայացնում էր ԱԺ հանրապետական պատգամավոր Խաչիկ Մանուկյանը: Երբ փորձեցի պարզել նրա առնչությունը նորաստեղծ բիզնեսին` պատասխանն առավել քան անկեղծ էր: «Սեփականատեր ե՞ք հիմնարկի»,- հարցիս պատգամավորը պատասխանեց. «Իհարկե»: Սակայն, երբ դահլիճից նրա թիմակիցներից մեկը փորձեց կանխել բացահայտումը, տեղից գոռալով` ո’չ, Խաչիկ Մանուկյանը որոշեց ճշտել, թե` Գեգամետի հիմնադիրներից եմ:

Այն, որ պատգամավորը տեղյակ չէ «Սեւանի մասին» օրենքի պահանջներին, թերեւս տարօրինակ չէ, քանի որ այն ընդունվել է 2001-ին, երբ ինքը դեռեւս պատգամավոր չէր, բայց տեղյակ չէ նաեւ ԱԺ կանոնակարգին, որի համաձայն՝ ինքն իրավունք չունի զբաղվել ձեռնարկատիրկան գործունեությամբ:

ՀԱՅԱՍՏԱՆԻ ՀԱՆՔԱՐԴՅՈՒՆԱԲԵՐԱԿԱՆ ՈԼՈՐՏՈՒՄ ԿԻՐԱԿԱՆԱՑՎԻ 25 ՄԼՆ ԴՈԼԱՐ ԱՐԺՈՂՈՒԹՅԱՄԲ ՆԱԽԱԳԻԾ
Սամվել Սարգսյան, «Նոյյան Տապան»

Հայ-ռուս-բրիտանական «ԳԵԳԱՄԵՏ» հանքարդյունաբերական նորաստեղծ ձեռնարկության գործունեության մեկնարկը կնշանավորվի 25 մլն ԱՄՆ դոլար արժողությամբ ներդրումային նախագծով, որը համատեղ կիրականացնեն ռուսական «Յունիաստրում Բանկ»-ը, այդ բանկի կողմից հիմնադրված հայկական «Յունիբանկ»-ը, հայկական «Metta Group» եւ Բրիտանական Վիրջինյան կղզիների «Torront Holdings Limited» ընկերությունները: Այս մասին հայտարարվեց կողմերի ներկայացուցիչների համատեղ ասուլիսի ժամանակ, որին մասնակցեց ՀՀ վարչապետ Տիգրան Սարգսյանը:

Նախագծին մասնակից «Մաքս Գրուպ» ընկերության հիմնադիր, ՀՀ ԱԺ պատգամավոր Խաչատուր Մանուկյանը նշեց, որ ներդրումային նախագիծը ներառում է Շորժայի եւ Ջիլի հանքավայրերի շահագործումը, լեռնահարստացման կոմբինատի կառուցումը, հրակայուն աղյուսների /տարեկան 20 մլն հատ հզորությամբ/, ցեմենտի ստացման հավելանյութերի /տարեկան 150 հազար տոննա հզորությամբ/, քրոմի խթանյութի /տարեկան 50 հազար տոննա հզորությամբ/ եւ երկաթաքրոմի /տարեկան 20 հազար տոննա հզորությամբ/ գործարանների շինարարությունը:

Նշված բանկերի համասեփականատեր Գ.Զաքարյանը հնարավոր համարեց նաեւ նշված հանքավայրերի հանքանյութից ոսկու եւ պլատինի կորզումը: Նրա գնահատմամբ, նախագծով նմերդրումները կվերադառնան 3 տարվա ընթացքում, ինչը վերադարձնելիության շատ բարձր ցուցանիշ է: Նախատեսվում է, որ այդ ծրագրերի իրականացման արդյուքնում կստեղծվի 500 աշխատատեղ:

Ըստ ռուսաստանյան «ԳԻՆՑՎԵՏՄԵՏ» գիտահետազոտական ինստիտուտի փոշեմետալուրգիայի լաբորատորիայի վարիչ Պավել Կովգանի, «ԳԵԳԱՄԵՏ»-ն օգտագործելու է իր մտավոր սեփականությունը հանդիսացող տեխնոլոգիաները: Նրա խոսքերով, Սեւանա լճի ափին կառուցվելիք լեռնահարստացման կոմբինատում կիրառվելու են անթափոն տեխնոլոգիաներ, իսկ քրոմի ձուլման համար ջուրը կօգտագործվի փակ ցիկլով:

Ըստ Տ.Սարգսյանի, իրականացվելիք նախագծի մեկնարկը տրվում է միջազգային ֆինանսական ճգնաժամի պայմաններում, երբ հանքարդյունաբերական արտադրանքի գները միջազգային շուկաներում նվազում են: Նրա խոսքերով, այդ նախագիծը վկայում է Հայաստանի նկատմամբ ներդրողների վստահության մասին: Հույս հայտնվեց, որ «ԳԵԳԱՄԵՏ»-ի, ինչպես նաեւ Գ.Զաքարյանի կողմից Հայաստանում «ՅՈՒՆԻՌԵՍՈ» ապահովագրական ընկերության հիմնադրման ներդրումները կունենան ցուցադրական էֆեկտ այն առումով, որ ԱՊՀ երկրների սփյուռքահայերը Հայաստանում կգտնեն իրենց խնայողությունների եւ ներդրումների համար հուսալի, երաշխավորված նախագծեր: «Կարծում եմ, որ Հայաստանը ներկայումս ունի իր առավելությունը ցուցադրելու եւ այդ ներդրումները ներգրավելու շանս»,-նշեց ՀՀ վարչապետը:

Նա վստահեցրեց, որ «ԳԵԳԱՄԵՏ»-ի նախագիծը համապատասխանում է Սեւանի մասին ՀՀ օրենքի պահանջներին եւ նախագծի իրականացման ժամանակ էկոլոգիական նորմերը պետք է պահպանվեն: Տ.Սարգսյանը հայտնեց ներդրողների հետ միասին շահագրգիռ բոլոր կողմերի եւ անկախ փորձագետների մասնակցությամբ «ԳԵԳԱՄԵՏ»-ի նախագծի հասարակական քննարկումներ կազմակերպելու պատրաստակամություն:

Նոյեմբեր 14, 2008


Առնչվող նյութեր


Կատեգորիա

ավելին
պակաս

Մարզեր