Անկախ խորհրդատվական ընկերությունն էկոլոգիական ռիսկեր չի հայտնաբերել Ամուլսարի ոսկեբեր հանքավայրի շահագործման նախագծում

ԱրմԻնֆո

Wardell Armstrong անկախ խորհրդատվական ընկերությունն էկոլոգիական ռիսկեր չի հայտնաբերել Ամուլսարի ոսկեբեր հանքավայրի շահագործման նախագծում: Այդ մասին հայտարարել է ընկերության տնօրեն Յան Լյուիսը`ներկայացնելով հանքավայրին կից գյուղական համայնքներում, ինչպես նաև Ջերմուկի քաղաքապետարանում հանրային լսումների ժամանակ նախագծի գնատականը: Լսումները տեղի են ունեցել մայիսի 14 – 15-ը: Հիշեցնենք, որ Ամուլսարի հանքավայրը հետախուզվում է բրիտանական Lydian International-ի դուստր ընկերության`«Գեոթիմ» ՓԲԸ կողմից: Wardell Armstrong-ը կազմում է նախագծի էկոլոգիական և սոցիալական գնահատականը: Յան Լյուիսի ներկայացրած գնահատականի համաձայն, տվյալ պահին նախագծում էկոլոգիական և սոցիալական ռիսկեր չեն հայտնաբերվել: 

Նշենք, որ ապրիլի 22-ին «ԷկոԼուր»-ը հարցում էր ուղարկել ՀՀ էներգետիկայի եւ բնական պաշարների նախարարություն` հարցով, թե ինչ հանքավայր է շահագործվում, արդյոք Ամուլսարում անցկացվել են  ռադիոակտիվ ֆոնի ուսումնասիություններ և ինչպիսի արդյունքեր են ստացվել: Այսօր «ԷկոԼուրի» տարածած հաղորդագրության համաձայն, նախարարության պատասխանում ասվում է, որ «Գեոթիմե ընկերության տնօրեն Հայկ Ալոյանի տրամադրած տեղեկատվության համաձայն, «Ամուլսարի ոսկեբեր քվարցիտների հանքավայրի լրահետախուզական աշխատանքների ընթացքում կատարվել է մոտ 3500 նմուշարկում, որոնց լաբորատոր փորձարկումներն իրականացվել է կանադական «ALS Chemexե լաբորատորիայում (ք. Վանկուվեր): Համաձայն վերջինիս տվյալների` Ամուլսարի ոսկեբեր քվարցիտների հանքաքարի փորձարկված նմուշներում ռադիոակտիվ օգտակար հանածոյի պարունակությունը կազմել է առավելագույնը 0,0002%»: Ըստ որում, «ԷկոԼուրը» նշում է, որ նախարարությունը հիմնվում է միայն Lydian Internatioal-ի կողմից տրամադրված տվյալների վրա:

Մայիս 23, 2011 at 16:51