

Aysor.am
Եթե ուրանի պաշարները բավարար լինեն շահագործում սկսելու համար, ապա դա քաղաքական որոշում կպահանջի: «Aysor.am»-ին նման կարծիք հայտնեց «Հայ-ռուսական լեռնահանքային կազմակերպություն» ՓԲԸ-ի գլխավոր տնօրեն Մկրտիչ Կիրակոսյանը:
Հայաստանի Սյունիքի մարզում մոտ ժամանակներս կարող են սկսվել ուրանի և ուղեկից օգտակար հանածոների երկրաբանական հետախուզման աշխատանքները:
«Հայ-ռուսական լեռնահանքային կազմակերպություն» ՓԲԸ տնօրեն Մկրտիչ Կիրակոսյանը Aysor-ին հայտնեց, որ «ՀՀ Սյունիքի մարզում ուրանի և ուղեկից օգտակար հանածոների երկրաբանահետախուզման 2009 թ.» ծրագրի շրջանակներում իրենք նախատեսում են երկրաքիմիական և երկրաբանական ուսումնասիրություններ կատարել:
Հիշեցնենք, որ «Հայ-ռուսական լեռնահանքային կազմակերպություն» ՓԲԸ հիմնադրվել է 2008 թ.` հայկական և ռուսական կողմերի հավասար մասնաբաժիններով:
«Ստանդարտ հետախուզում է, այնպիսին, ինչպիսին մետաղների` պղնձի, մոլիբդենի, որոնման ժամանակ է արվում: Վերցվում են նմուշներ, անալիզներ են արվում` որակական և քանակական կազմը պարզելու համար: Ուրանի կենսաերկրաբանական հետախուզումը հիմնականում ոչնչով չի տարբերվում պղնձի և մոլիբդենի հետախուզումից»,- ասաց Մ. Կիրակոսյանը:
Նրա խոսքերով, Հայաստանում ուրանի ռադիացիայի բնական ֆոնն արդեն բավականին բարձր է: Սյունիքում ուրանի պաշարների նախնական գնահատականեր չկան: Որոշ ընդհանուր տվյալներ կան խորհրդային շրջանից, երբ ավելի քան 35 տարի ուսումնասիրություններ են կատարվել տվյալ շրջանում` այդ թվում և ուրանի մասով: Մ. Կիրակոսյանի խոսքերով, այժմ եղած տեղեկությունները պետք է վերագնահատվեն, քանի որ գնահատման մեթոդները փոխվել են, ավելի կատարելագրծվել:
Նա հավելեց, որ նավթի արդյունահանումը շրջակա միջավայրին ավելի մեծ վնաս է պատճառում, քան ուրանի արդյունահանումը և շեշտեց, որ տվյալ դեպքում խոսքը ոչ թե ուրանի հարստացման, այլ արդյունահանման և տեղափոխման մասին է:
Տեղեկացնենք նաև, որ ՀՀ բնապահպանության նախարարությունը և «Հայ-ռուսական լեռնահանքային կազմակերպություն» ՓԲԸ-ն Սյունիքի մարզպետարանում երեկ կազմակերպել էին շրջակա միջավայրի վրա ազդեցության հասարակական լսումներ` «ՀՀ Սյունիքի մարզում ուրանի և ուղեկից օգտակար հանածոների երկրաբանահետախուզման 2009 թ.» ծրագրի վերաբերյալ: Լսումներին մասնակցել են ՀՀ էներգետիկայի և բնապահպանության նախարարությունների ներկայացուցիչներ, գիտնականներ, ՀՀ ԳԱԱ ակադեմիկոս, ուրանագետ Սերգեյ Գրիգորյանը, ով նաև ընկերության գլխավոր խորհրդատուն է:
«Բնապահպանական փորձաքննություն» ՊՈԱԿ-ի փորձագետ Հարություն Ավետիսյանը մեզ հայտնեց, որ ուրանի վերաբերյալ խնդիրներ շատ կան և լսումները կշարունակվեն 10 օր հետո Երևանում:
Հավելենք, որ մասնագետների կարծիքով, ուրանը հետազոտության փուլում վտանգավոր չէ, այն սկսում է ճառագայթել միայն հարստացումից հետո: Խորհրդային տարիներին կատարված ուսումնասիրությունների համաձայն` Հայաստանում ուրանի պաշարը կազմում է մոտ 30 հզ. տոննա։
Օգոստոս 14, 2009
