ԷկոԼուր
Թեղուտ եւ Շնող համայնքների մոտ 3000 մետր վարչական տարածքում նոյեմբերի 14-ին տնկվեց շուրջ 1000 հացենի: Ծառատունկին մասնակցեց մոտ 140 մարդ Հայաստանի մանկավարժական, Ագրարային, Երևանի պետական, ճարտարապետական, Երևանի ճարտարապետաշինարարական, Հայ-ռուսական սլավոնական, Հայաստանի պետական տնտեսագիտական, Երևանի պետական բժշկական համալսարաններից, Վանաձորից, Ալավերդուց, տարբեր հաստատություններից, Թեղուտից եւ Շնողից: Ծառատունկը կազմակերպել էր «Vallex Group»-ը:
Նշենք, որ նմանատիպ ուսանողական ծառատունկ նույն տնկարանում ընկերությունը կազմակերպել էր նաեւ գարնանը: Այն ժամանակ տնկվել էր 931 ծառ` ընկուզենի, կեռասենի, տանձենի: Սակայն գարնանը տնկված ծառերի կպչողականության մասին տարբեր մարդիկ տարբեր կարծիք ունեին: Ըստ «Թեղուտ» ՓԲԸ-ի տնօրեն Ռուբեն Պապոյանի տնկիների մոտ 90%-ը կպած է: Մինչդեռ Լալվար անտառտնտեսության տնօրեն Կամո Շահնազարյանի կարծիքով ծառերի 60-70%-ն է կպած: «Երկու տարի հետո նոր սրա աճը կերեւա: 10 տարում սա մոտավորապես մի 7-8 մետր բոյ կքաշի»,-ասաց Կամո Շահնազարյանը: Չնայած մասնագետի հուսադրող դիտարկումներին, Ալավերդու «Անահիտ կանանց աջակցության կենտրոն» ՀԿ-ի նախագահ Լարիսա Փարեմուզյանը լավատես չէ: «Ընդհանուր առմամբ ես կարծում եմ, որ կպչողականությունը շատ ցածր է այս հատվածում: Ծառի կպչողականությունը ես 10% էլ չեմ համարում իմ դիտարկումներից հետո»,- էկոլուրի հետ զրույցում նշեց Լարիսա Փարեմուզյան: (Տե՛ս լուսանկարները):
Ողջ տնկարանը ծածկված էր մացառներով, որոնք եւս խանգարում են տնկիների աճին: Կամո Շահնազարյանը նկատեց, որ մացառները պետք է մաքրվեն: Երբ ծառերը կմեծանան, այն ժամանակ միայն մացառները նրանց համար վտանգ չեն ներկայացնի:
Հիշեցնենք, որ այս ծառատունկը որեւէ առնչություն չունի ընկերության բնապահպանական կառավարման պլանով նախատեսված ծառատունկի հետ: Այդ ծառատունկը իրականացնում են «Vallex Group»-ի հայտարարած մրցույթում հաղթած «Տրի գրեն» և «Աղավնատուր» ՍՊԸ-ները: Ըստ «Թեղուտ» ՓԲԸ-ի տնօրեն Ռուբեն Պապոյանի` ընկերություններն այս պահին իրականացնում են 135 հա անտառատնկում` 67 հա Թեղուտ-Շնող համայնքներում, մնացածը՝ Տաշիրում:
Նոյեմբեր 17, 2009