ԷկոԼուր
Սույն թվականի փետրվարի 4-ին ՀՀ վարչական դատարանում տեղի ունեցավ Ամուլսարի ոսկու ծրագրի վերաբերյալ նոր դատական գործով առաջին նիստը:
Հայցվորները՝ Ջերմուկ առողջարանի և Գնդեվազ գյուղի 19 բնակիչներ, դատի են տվել ՀՀ բնապահպանության նախարար Էրիկ Գրիգորյանին` պահանջով պարտավորեցնել նրան ուժը կորցրած ճանաչել Ամուլսարի ոսկու հանքավայրի հանքարդյունահանման համալիրի փոփոխված նախագծի շրջակա միջավայրի վրա ազդեցության պետական փորձաքննական հ. ԲՓ 35 եզրակացությունը և ՀՀ բնապահպանության նախարարի 29.04.2016թ. դրա հաստատումը:
Դատական նիստին մասնակցում էին հայցվոր կողմի փաստաբան Նազելի Վարդանյանը, հայցվոր, Գնդեվազ գյուղի բնակիչ Թեհմինե Ենոքյանը, պատասխանող կողմի՝ ՀՀ բնապահպանության նախարարության ներկայացուցիչ Երվանդ Մուրադյանը: Որպես երրորդ կողմ ներգրավված ՀՀ ֆինանսների նախարարությունից ներկայացուցիչ չկար: Դատական նիստը վարում էր դատավոր Արծրուն Միրզոյանը:
Փաստաբան Նազելի Վարդանյանը ներկայացրեց 3 գործոնները, որոնց հիման վրա կազմված է հայցը:
«19 քաղաքացուց 6-ը Ջերմուկի բնակիչ են, 13-ը՝ Գնդեվազի, որոնց գյուղի տարածքում նախատեսված է հանքարդյունաբերությունը, ինչի արդյունքում բնակիչներն արդեն կրում են թե առողջական և թե նյութական վնասներ: Նրանք կորցրել են իրենց այգիները, արոտավայրերը, աղտոտվել է իրենց հիմնական խմելու ջրի աղբյուրը: Մարդիկ շնչում են հանքարդյունահանման շինարարական աշխատանքներից առաջացած փոշին: Այս ամենի պատճառով բնակիչները ներկայացրել են դիմում բնապահպանության նախարարին, քանի որ ընկերության կողմից ոչ ճշգրիտ տվյալներ են ներկայացվել››, - ասաց Նազելի Վարդանյանը:
ՀՀ բնապահպանության նախարարության ներկայացուցիչ Երվանդ Մուրադյանը միջնորդություն ներկայացրեց՝ կասեցնելու գործի քննությունը: Որպես հիմնավորում նա մեջբերեց 2018 թ-ի հուլիսի 20-ին ՀՀ քննչական կոմիտեում հարուցված քրեական գործը՝ ՀՀ բնապահպանության նախարարության պաշտոնատար անձանց կողմից շրջակա միջավայրի աղտոտման մասին տեղեկությունները դիտավորությամբ թաքցնելու առերևույթ դեպքի առթիվ: Երվանդ Մուրադյանը միջնորդեց կասեցնել դատական գործի քննությունը, մինչև նշված քրեական գործով որոշում կկայացվի: Փաստաբան Նազելի Վարդանյանը նշեց, որ տվյալ քրեական գործն առնչություն չունի հայցվորների ներկայացրած նոր գործոնների և պահանջների հետ:
Դատարանը պատասխանող կողմից պահանջեց ներկայացնել քրեական գործ հարուցելու մասին որոշումը և փաստերը, որոնց հիման վրա հարուցվել է քրեական գործը: Պատասխանողը դատարանից խնդրեց երկու շաբաթ ժամկետ:
Դատարանը որոշեց դատական գործով որպես երրորդ կողմ ներգրավվել ‹‹Շրջակա միջավայրի վրա ազդեցության փորձաքննական կենտրոն›› ՊՈԱԿ-ին: Կողմերից առարկություններ չհնչեցին:
Նոր դատական նիստը դատավորը նշանակեց երկու ամիս անց՝ ապրիլի 8-ին, ժամը 14:30-ին:
Փետրվար 04, 2019 at 20:31