Համաշխարհային բանկը Հայաստանին կտրամադրի 500,000 ԱՄՆ դոլար գումարի չափով դրամաշնորհ, որի աջակցությամբ կիրականացվեն միջոցառումներ՝ ուղղված Հայաստանի Հանրապետության՝ «Արդյունահանող ճյուղերի թափանցիկության նախաձեռնություն» (ԱՃԹՆ/EITI) միջազգային ասոցիացիայի շրջանակում ստանձնած պարտավորությունների շարունակական իրականացմանը և երկրի անդամակցության կարգավիճակի պահպանմանը: Սույն թվականի հունիսի 10-ին գործադիրը հավանություն տվեց 2021 թվականի մայիսի 17-ին ստորագրված՝ Հայաստանի Հանրապետության և Համաշխարհային բանկի միջև «Հայաստանի արդյունահանող ճյուղերի թափանցիկության նախաձեռնությանն աջակցության լրացուցիչ ֆինանսավորում» (դրամաշնորհ N TF0B4808) նամակ-համաձայնագիրը հաստատելու մասին Հայաստանի Հանրապետության նախագահի հրամանագրի նախագծին:
Նոր դրամաշնորհի շրջանակներում նախատեսվում է՝
- ԱՃԹՆ-ի երկու ազգային զեկույցների տվյալների համակարգված բացահայտումների մոտեցման ինտեգրում.
- Համակարգված բացահայտումներ՝ ինքնաշխատ բաց տվյալներ գեներացնող պորտալի ծրագրային ապահովման և ոլորտին առնչվող ճյուղային նախարարությունների և այլ պետական մարմինների կայքէջերի զարգացման, տվյալների ինքնաշխատ կանոնավոր հրապարակումների ծրագրային ապահովումների մշակման միջոցով.
- Իրավական աջակցություն՝ վավերացման առաջին զեկույցի և ԱՃԹՆ-ի ազգային զեկույցների վրա հիմնված ուղղիչ գործողություններին և օրենսդրական առաջարկություններին արձագանքելու և համակարգված բացահայտումների համար իրավական միջավայր ձևավորելու համար.
- Կարողությունների ստեղծման աշխատանքներ ԱՃԹՆ-ի ներդրման գործընթացը վերահսկող բազմաշահառու խմբի (ԲՇԽ), համապատասխան ճյուղային նախարարությունների և այլ պետական հաստատությունների, Հաշվեքննիչ պալատի, Ազգային ժողովի, ազդակիր համայնքների, քաղաքացիական հասարակության կազմակերպությունների և գիտական-ուսումնական հաստատությունների համար՝ ԱՃԹՆ-ի տվյալները որոշումների կայացման, ոլորտային քաղաքականության մշակման գործընթացներում օգտագործելու կարողության, մասնավորապես՝ ազդակիր համայնքներում համայնքի արդյունավետ մասնակցությունը ապահովելու, կայուն զարգացման ծրագրերի և քաղաքականության նախապատրաստման, ԱՃԹՆ-ի գործընթացի միջոցով բացահայտված իրավական անհամապատասխանությունների վերացման և նաև սահմանված ժամկետում ԱՃԹՆ-ի համատեքստին վերաբերող տվյալների պատրաստումն ու հրապարակումը ինստիտուցիոնալացնելու համար.
- Կարողությունների ստեղծման մասնագիտացված աշխատանքներ Հաշվեքննիչ պալատի համար, որպեսզի այն պատրաստ լինի ԱՃԹՆ-ի համատեքստում Անկախ ադմինստրատորի դերը ստանձնելուն.
- Համայնքներում հանքարդյունաբերության ոլորտի սոցիալ-տնտեսական և բնապահպանական ազդեցություններին առնչվող հարցերի ուղղությամբ հանրային մասնակցության հզորացում.
- Իրազեկման բարձրացման ռազմավարության մշակում, այդ թվում՝ սոցիալական ցանցերով տեղեկատվության տարածում, հարցազրույցներ և հեռուստառադիո ռեպորտաժներ՝ հանրության իրազեկման բարձրացման և տեղեկացված երկխոսությանը մասնակցության համար.
- Ակադեմիական հետազոտությունների մրցույթներ, թեմատիկ վերլուծության և հետազոտական աշխատությունների հրապարակում համալսարանների և ուսումնական հաստատությունների ուսանողների և հետազոտողների կողմից,
- Ոլորտի շուրջ լայն և շարունակական խորհրդակցություններ և քննարկումներ որոշում կայացնողների և հիմնական շահագրգիռ կողմերի հետ։
Այս դրամաշնորհը համարվում է 2018թ. Համաշխարհային բանկի հետ ստորագրված «Հայաստանի արդյունահանող ճյուղերի թափանցիկության նախաձեռնությանն աջակցության» դրամաշնորհային ծրագրի շարունակությունը: Ծրագրով տրամադրված 350 000 ԱՄՆ դոլարի չափով միջոցների շնորհիվ 2018-2020թթ. իրականացվել են մի շարք աշխատանքներ, որոնցից են՝
- Հայաստանի ԱՃԹՆ-ի առաջին և երկրորդ ազգային զեկույցների հրապարակումը՝ մետաղական հանքարդյունաբերության ոլորտի ԱՃԹՆ-ի միջազգային ստանդարտին համապատասխանող համապարփակ տեղեկատվությամբ:
- Ընդերքօգտագործող ընկերությունների և լիազոր պետական մարմինների կողմից ԱՃԹՆ-ի հրապարակային հաշվետվությունների ներկայացման պարտադիր պահանջները, ընդերքօգտագործման պայմանագրերի և ԱՃԹՆ-ի ստանդարտին համապատասխան մետաղական հանքարդյունաբերության ոլորտում ընդերքօգտագործման թույլտվությունների ռեգիստրի հրապարակման պահանջների ամրագրումը օրենսդրորեն:
- www.eiti.am ԱՃԹՆ-ի հայաստանյան կայքի մշակումն ու գործարկումը:
- Ընդերքօգտագործող ընկերությունների կողմից իրական սեփականատերերի պարտադիր բացահայտման պահանջը կարգավորող իրավական ակտերի ընդունումը: Ընդունված օրենսդրական կարգավորումների հիման վրա 2020թ. փետրվարից ընդերքօգտագործող ընկերությունները ներկայացրել են իրական սեփականատերերի վերաբերյալ հայտարարագրերը:
- Իրական սեփականատերերի հայտարարագրերի առցանց ներկայացման համակարգի գործարկումը, որը հանդիսանում է ՀՀ ԱՆ իրավաբանական անձանց պետական ռեգիստրի համակարգի մաս: Այս մասին նշված է ՀՀ կառավարության որոշման նախագծի հիմնավորման մեջ:
Հունիս 16, 2021 at 17:02